أنا باقي كانقرا و عيطوا لي للخدمة العسكرية 😨 شنو المعمول 😟

بناء على النصوص القانونية والمذكرات الوزارية الصادرة في هذا الشان 

كيفما فخباركم ، بدات عملية إحصاء و استدعاء الشباب و الشابات البالغين من 19 الى 25 سنة من أجل الخدمة العسكرية 🤷🏻‍♂ لي كاتهم بالأساس الشباب الغير مزاولين لأي نشاط مهني و المنقطعين عن الدراسة 🤔 لكن ممكن حتا الطلبة و المتدربين لي باقي كايقراو ممكن أن تتم المناداة عليهم فهاد الفترة 😳 إذا شنو المعمول و كيفاش يمكن ليك تستافد من الإعفاء من الخدمة العسكرية بلا مايتابعوك او يبرزطوك 😒 ؟

الطلبة لي كايقراو فالكليات أو المدارس أو المعاهد العليا أو التكوين المهني سواء فالقطاع العمومي أو القطاع الخصوصي ، لي وصلوا الإشعار بأنه مدعوا للخدمة العسكرية أول حاجة كايديرها هي كاتمشي لإدارة المؤسسة فين كاتقرا و كاتطلب منهم يعطوك شهادة مدرسية كاتثبت أنك تتابع الدراسة او التكوين فهاد السنة 2019/2018
من بعد كاتعمر طلب خطي قصد الإعفاء من الخدمة العسكرية و النموذج ديال هاد الطلب غاتلقاوه فالرابط  أسفله .
الخطوة الموالية هي فحدود 20 يوم على الأكثر من التاريخ لي وصلك فيه الإشعار كاتدي الطلب + الشهادة المدرسية للقيادة أو العمالة لي نتا تابع ليها و ضروري جدا أنك فاش تعطيهم الملف ديالك خاصك تشد من عندهم وصل إيداع و يكون مكاشي من عندهم ، باش فحالة من بعد جاو عندك للدار و قالوا ليك جمع شاكوشك مالك تعطلتي 😖 ! كاتوريهم وصل الإيداع على أساس أنك دفعتي طلب الإعفاء 😆

و بهاكا كاتكون درتي لي عليك و تهنيتي من هاد صداع الراس مؤقتا 😣 !! آه مؤقتا حيت بالنسبة للدراسة راه كايعطيو إعفاء مؤقت يعني كايصبرو عليك حتا تسالي قرايتك و من بعد ممكن يعيطوا ليك 🤦🏻‍♂ ديك الساعة فحالة ساليتي قرايتك و نتا باقي ماوصلتي 25 سنة و مابغيتيش تمشي للتجنيد ، الحل لي عندك هو تلقى خدمة (خدمة بالوراق يعني مصرح بيك قانونيا أنك أجير أو موظف)

نتمنى نكون عطيتكم فكرة على كيفاش تستافدو من الإعفاء من آداء الخدمة العسكرية و حتا نتوما بارطاجيو وصلوا هاد المعلومات لخوتكم الطلبة و الطالبات 😍🥰

 إسحاق غانم .

لتحميل الطلب والمزيد من المعلومات  اضغط هنا